每一位學生攏是教室內底的主人/陳品怡
這幾冬會當發覺著囡仔的台語口語程度是愈來愈bái，學期尾的口試，彼若是較早，只要sió-khuá-á 引tshuā學生，in就會當念kah真順，一班內底至少有八成會當完成口試愛達成的目標，毋過這幾冬，kāng款的指導時間，tsit-má有五成的學生有法度順順仔kā唸出來就足厲害矣。
若看koh較幼，我觀察著對囡仔來講，一塊一塊的語詞抑是音標的唸讀，in攏較有法度掌握，猶毋過拄著一條一條的句型對in來講就有困難矣，當然我會當怪政府、怪制度無法度予本土語koh較tsē的教學時間，我嘛會當怪這馬學生身軀邊攏愈來愈bē-tàng當聽著、練著台語，口語程度會愈來愈bái嘛是無意外，不而過，若是一直去講tsia咱現此時無法度改變現況的代誌，án-ne問題嘛是無法度解決，所以我的決定是做我會當改善、改變這ê問題的動作kah行動。
學生口語句型表現siūnn bái就是練習量無夠，所以我調整課程的內容，加一節課的時間來指導學生，重新設計一套口語句型的闖關活動，目標就是予in會當透過這節課好好仔練習koh較tsē句型，而且嘛希望發揮台語能力好的學生，予in有發展的空間。
頭起先這ê口語練習闖關活動操作起來是sió-khuá-á亂的，原成為著欲予學生靜落來，我予學生就坐tī椅仔頂，輪流闖關，拄著的問題就是關kah關之間因為tshāi了傷uá，然後等待闖關的學生因為坐較遠，koh想欲講話，互相影響之下就是逐家講話攏愈來愈大聲，口語練習的效果就無好。
有一種習慣應該是真tsē老師會做的代誌，彼就是tī每一節課上了了後重新審思一節課內底tó-uī按怎調整會koh較好？後來我m̄-nā調整，koh去問幾位教學經驗較豐富的老師，kah in討論了，有幾位老師問我的問題予我kàu-tann印象攏蓋深，in講：
「你先想看覓你想欲予學生達成啥物款程度的學習？敢有達成？」
「動態活動的秩序kah靜態的教學所要求的秩序無kāng，動態活動koh叫學生tiām kah親像tiàm圖書館kāng款，按呢敢耍會起來？」
「目標是首要，秩序的其二。」這是我得著的結論。
當然若是會當目標kah秩序攏達成才是上理想，所以轉去厝裡了後繼續激頭殼，後來tī教學現場亦調整幾kuí-nā擺教學方式、流程，大概掌握著活動愛順利進行需要幾ê要點：
- 明確的規則建立：活動進前愛預告任何活動當中會發生的狀況，比論講若是有人無照步來，老師會按怎處理。
- 大量的口語練習：才會當予學生感覺這ê活動伊有法度達成，才有想欲闖關的欲望。
- 強烈的引起動機：除了活動本身的吸引力，koh愛結合班級經營，比論講達成闖關目標的學生會當得著的分數加倍。
- Kíng khiàng-kha伶俐的關主：新接的班級恐驚較無法度隨知影一班內底台語能力好、做代誌koh頂真的學生有啥人，需要開時間和學生相處，才有才調選出siōng 適合的關主，所以活動適合tī學期尾，老師對班級有一定的熟悉度了後才來進行上好。
落尾，除了以上的重點，我koh調整予關主tī教室內底的邊仔角進行關卡，學生直接離開位置去闖關。按呢調整了後，予人料想bē到的代誌就發生矣！
原成掠準予學生離開教室in可能會烏白tsông，會koh較亂，結果我想像的畫面無出現，顛倒出現的是學生因為互相之間的距離變較倚，每一關的距離加較遠了後，每一ê人講話的聲音就攏便細聲矣，逐家bē去予別人影響著，會當koh較注心練習。
「予學生適合的空間操作，學生的表現有當陣仔表現koh會超過老師的期待」，經過調整的教學確實證明這句話是著的。
後來的幾班，改做這種離開位置的闖關，會當看著學生攏真專心投入tī活動內底，每一ê人毋是咧闖關就是那練習那準備闖關的狀態。
我kíng出來的關主攏是每一班內底台語上phú-lòo的，關主攏會發揮in上大的作用，就是分工替老師kā班上猶koh較bē-hiáu的學生攏教到會曉，嘛觀察著平常時仔學習狀況較無好的囡仔，tī這ê活動內底嘛參與kah真認真。
這就是我想欲看著的，教學的目標有達成，秩序嘛bē-bái，無任何一ê囡仔hőng pàng-sak，每一位學生攏是教室內底的主人。
2024.08.30
留言列表
