語詞、音標的教學較明確，大部分老師攏是對課文欲按怎教較頭痛。以下的教學方法大部分較適合用佇國小的學生，愈後面的練習的層次愈懸，老師才看學生的程度和課文的內容來安排適合的教法，歡迎參考了後家己閣改編。
- 掠手指頭：倒手掌心向塗跤，正手伸出指指拄佇隔壁同學的掌心，當當老師念到關鍵字句愛緊共倒手掌心收起來、正手愛離開莫予別人掠著(嘛會當分組進行，一人伸掌負責掠，其他伸出指指負責逃走（適合中低年級）。
- 課文分段分組練習：分著仝段的組員做伙練習，閣轉去回原組共原本的課文接起來。
- 課文精熟練習：老師念台語課文予學生接台語（練發音），煞落來老師念台語接予學生接華語（練理解），落尾老師念華語接學生接台語（練翻譯），老師會當照課文順序念，嘛會當佇學生較熟課文了後跳咧念。
- 麥克風文句接尾：點一位學生念第一句，學生唸煞了後將麥克風隨機傳給下一位，請後一位接念第二句，繼續落去。麥克風文句接尾老師版：老師那行那𤆬全班念課文，佇重點的所在停落來點人繼續讀落去。
- 課文內底有明顯動作的會當分組討論動作按怎呈現，那念文句子愛那表演出動作，予學生互評。
- 圈重點詞，念著重點的語詞、文句會當拍噗仔、頓跤、𢯾頭，增加佇課文頂懸的專注度。
- 朗讀卡：予學生抽朗讀卡，使用無仝的聲音風格練習課文，比如講機器人、細聲到大聲、動物的叫聲。
- 課文語詞九宮格翻譯賓果：練習課文內底較重要的語詞抑是文句、語法。
- 課文挖空：拄開始先針對較困難的字詞挖空，等待學生有較熟了後，共挖空的所在加長，上尾仔共規課攏背起來（適合短的韻文型課文，考驗學生的記憶力）。
- 對話型課文：會當予學生演戲，設計新的劇本劇情。
- 課文有明顯的先後順序的，會當共課文文章切開，共文句順序用亂，予學生家己分組討論排出正確的課文順序（老師會當提醒引𤆬學生思考觀察）。
- 課文聽寫練習：重點詞遮起來，予學生臆看覓台語漢字和音標愛按怎寫寫(使用小白板、白紙予學生練習，會當計分數)。
- 課文提問討論：老師設計出題，予學生分組討論寫出正確答案，而且練習使用台語回答。（會當配合六何法、情緒問答等閱讀理解策略）。
- 大耳仔來聽課文：長篇而且趣味有故事性的文章，會當先予學生親像咧聽繪本故事按呢，用聽的訓練台語聽力佮理解，配合問題單，那聽那回答問題來理解故事咧講啥（程度較無好的，會當予in文字那看那回答）。
- 模仿創作：老師予學生範例，予學生分組練習台語課文仿寫創作屬於家己文章。
臺羅拼音查詢注意事項
