年尾，聖誕節欲到矣，這擺將聖誕樹仔結合台語課程來試看覓
成品完成的時，攏真媠，效果袂䆀，而且真緊就會當熟手，學生用無10分鐘就隨摺好一个聖誕樹仔!
加畫圖閣有相關聖誕節詞彙教學，按呢簡單差不多是一節課拄好
需要的材料真簡單，若是欲做聖誕樹仔一叢，起頭先愛先準備：
色紙Ｘ１（會當是青色抑才是白色，青色色紙做出來的就是青色的聖誕樹仔，白色的做出來敢若是頂懸搭白雪仝款，攏真美麗）
彩色筆ＸＮ
剪刀Ｘ１
作法閣較簡單，干焦幾若个手勢就會當完成矣
色紙一開始愛先剪做一个圓箍仔
（這个部分我是家己先佇厝裡處理了後，才提去學校，也就是講，學生會直接提著一塊圓的色紙，袂用著鉸刀，較安全）
煞落來的摺紙方法，會當參考下面這本冊
《一張紙做一本書：每個人都能上手的超創意小書，王淑芬教你輕鬆做!》
經過摺紙了後，就進入課程較重要的所在，就是趁這機會來學習相關聖誕節的台語詞彙！
摺出來的樹仔拄好有空間，予學生會當佇頂懸畫圖發揮
那教學，那予學生知影一寡詞彙的念法佮用法
參像「雪人」這詞，我毋若會紹介seh-lâng白話音讀的讀法
順煞嘛會教落雪（lo̍h-seh）的台語按怎講
閣有文讀音的讀法，咱就有可能讀作雪人suat-jîn
規套紹介完結了後，煞落來，我就會予學生作伙來欣賞台語版的聖誕快樂歌
拄好是真平出版社的三年級課程補充歌曲：
台語版的歌詞內容是按呢:
北風呼呼吹，誰人對遮過，聖誕老阿伯，禮物揹一大袋；
也有運動鞋，也有尪仔冊，也有糖仔佮番麥，實在有夠濟。
緊來提，緊來提，一人有一個；
樓頂樓跤厝邊頭尾，逐家歡喜做伙，也唱歌，也泡茶，也有講笑詼；
上重要的就愛感謝聖誕老阿伯。
落尾就是歡喜的創作時間，台語的聖誕歌曲成做背景音樂陪綴學生創作、畫圖，順煞洗腦(欸毋是XD
那聽歌，那畫圖，真趣味的時間
而且簡單閣好熟手，材料嘛好攢好準備，若有機會真正會當大人囡仔攏來試看覓，佇厝裡嘛會當做，佇學校嘛會當結合其他的課堂，一兼二顧摸蜊仔兼洗褲的摺紙聖誕樹仔！
留言列表
