Phín-î ê kì-lo̍k khong-kan品怡的紀錄空間

兩工邀請著的講師演講攏真精彩，講著民俗、文化、文學、唸歌、創作....等等的內容，閣加實際表演、創作，智識內容飽滇，學習著真濟。

這擺營隊有分組，我和一陣古錐的少年家共事編劇本，上細漢的組員拄國中畢業爾爾，第二細漢的高一，第三細漢的猶無三十歲，平常時仔若我家己咧參加台語的教師研習，我定定攏是團隊內底上少年的，結果佇這擺的營隊內底，我顛倒是阮這組上老的。
兩工的營隊內底，我深刻感受著熱情、青春kah活力，這種感受平常時仔是真罕得有的（和佮國小囡仔做伙的感受無仝），落尾共編的劇本真趣味，原則上共阮這兩工營隊學著的物件，會當參的、加的，攏總濫濫入去矣，演出的效果就親像台語的讀者劇場仝款。
營隊彼工結束了後，閣走去大稻埕城隍廟看熱鬧(暗訪)，轉去高雄已經是半瞑仔三點，隔轉工拜一閣愛上班，是有較忝，毋過我忝甲真甘願🥰

以下是我和組員共編的劇本，名號做:愛看戲的大野狼

愛看戲的大野狼（凊彩拍ê）

戲齣長度：10min

角色分配：

舞台指示（椀琹）

大野狼（陳品怡）：壓霸、「傲嬌」、生了足䆀的

豬大姊－豬頭（劉芯瑀）：大公主、愛司奶

豬二兄－豬肚（蔡卓恆）：驕傲、衝碰

豬小妹－豬跤（余宥潔）：文雅、冷靜、讀冊人

△真久真久以前，有一隻愛看表演的大野狼，四界走揣上phu-loo的表演，毋過按怎揣都揣無，心內鬱卒甲…唉…有一條歌是按呢唱的，一時失志毋免怨嘆，一時落魄毋免膽寒，三分天註定、七分靠打拼、愛拚才－會－贏～！有一工，伊來到一个豬仔庄。

大野狼：聽人咧講…這个庄頭有三隻豬仔囝誠有才情閣真gâu展！大姊豬頭gâu盤喙錦、二兄豬肚gâu唱歌、小妹豬跤gâu寫詩，我就來看覓到底是有偌gâu！（唱）列位貴君阮總請，生份毋捌恁大名，大野狼是恁祖媽的名，我欲去揣豬仔囝來唸歌予我聽。

△大野狼唱煞，隨行對豬頭𪜶兜去。到位了後，大野狼開始挵門。

大野狼：豬頭、豬頭，聽講你真gâu盤喙錦，緊出來表演予我看！

豬頭：你遮邇䆀，蟳仔看著攏會浡瀾（phu̍h-nuā），人阮無愛盤予你聽啦~

大野狼：你無愛演，我就共你食掉！

豬頭：莫食，莫食，我演予你看。

豬頭：（盤喙錦）和尚挵破鼓，提褲來補鼓，鼓破褲補，褲破布補，毋知是布補褲，抑是褲補鼓。

大野狼：（哈唏、強欲睏去的款）無聊！無聊！閣有其他的通看無？我欲看較趣味的，「下面一位」，呼～（共厝歕予倒）

豬頭：哇哇哇！人阮兜去hőng 歕去矣啦！救命、救命，我欲去揣阮小弟豬肚。

大野狼：好膽莫走！

△豬頭規路兇兇狂狂，走去豬肚𪜶兜，大野狼嘛佇後壁綴牢牢。

大野狼：追追追，追著你的心，追著你的人，追著你這隻豬仔囝。

豬頭：豬肚、豬肚，緊開門！有一隻大野狼咧共我逐。

豬肚：免驚、免驚，發生啥物代誌，講予恁爸聽。

豬頭：外口有一隻毋知對佗位來的大野狼，莫名其妙叫我表演予伊聽，結果人阮的厝…

大野狼：（碰碰碰）

△豬頭講猶未煞，就聽著大野狼來挵門。

大野狼：豬肚、豬肚，聽講你真gâu唱歌，緊出來表演予我看！

豬頭：你遮邇䆀，蟳仔看著攏會浡瀾（phu̍h-nuā），

豬肚：蝦仔看著嘛會倒彈，恁爸袂癮唱歌予你聽啦！

大野狼：你無愛演，我就共你食掉！

豬肚：莫食，莫食，我演予你看。（唱）身騎白馬走三關，改換素衣回中原，放下西涼沒人管，思念三姐王寶釧。

大野狼：（哈唏、強欲睏去的款）無聊！無聊！閣有其他的通看無？我欲看較趣味的，若無...（吸氣）

豬肚：有有有！無，唱這條！（唱）雞公想欲伊都啄草蜢，認為小隻伊都好創治，草蜢偏偏伊都毋驚伊，戲弄乎伊伊都氣半死，啊伊都那噯唷啊伊都氣半死。草螟仔弄雞公..雞公咇噗跳，草蜢仔弄雞公..雞公咇噗跳。

大野狼：（哈唏、強欲睏去的款）無聊！無聊！閣有其他的通看無？我欲看較趣味的，「下面一位」，呼～（共厝歕予倒）

豬頭：哇哇哇！人阮兜去hőng 歕去矣！救命、救命，阮欲去揣小妹豬跤。

豬肚：哇哇哇！恁爸的厝去hőng 歕去矣！救命、救命，阮欲去揣小妹豬跤。

大野狼：好膽莫走！

△豬頭佮豬肚規路兇兇狂狂，走去豬跤𪜶兜，大野狼嘛佇後壁綴牢牢。

大野狼：追追追，追著你的心，追著你的人，追著你這兩隻豬仔囝。

豬頭、豬肚：豬跤、豬跤，緊開門！有一隻大野狼咧共阮逐。

豬跤：免驚、免驚，發生啥物代誌，講予我聽。

豬肚：外口有一隻毋知對佗位來的大野狼，莫名其妙叫阮表演予伊聽，結果恁爸的厝…

大野狼：（碰碰碰）

△豬肚講猶未煞，就聽著大野狼來挵門。

大野狼：豬跤、豬跤，聽講你真gâu寫詩，緊出來表演予我看！

豬頭：你遮邇䆀，蟳仔看著攏會浡瀾（phu̍h-nuā），

豬肚：蝦仔看著嘛會倒彈（tò-tuānn），

豬跤：螿蜍（tsiunn-tsî）螿蜍看著會跳過岸，

豬頭、豬肚、豬跤：豬仔看著呸喙瀾，phuí！（三隻豬仔囝做伙呸喙瀾）

大野狼：你無愛演，我就共你食掉！

豬跤：莫食，莫食，我演予你看。

豬跤：（唸詩）大絃嘈嘈如急雨，小絃切切如私語。嘈嘈切切錯雜彈，大珠小珠落玉盤。間關鶯語花底滑，幽咽泉流水下灘。水泉冷澀絃凝絕，凝絕不通聲暫歇。別有幽愁闇恨生，此時無聲勝有聲。

大野狼：（那聽那哀）

△大野狼聽著豬跤的唸詩了後，感覺頭眩目暗，敢若去聽著一个熟似的旋律，大野狼開始伊的表演。（放音樂）

大野狼：阿媽架跤，阿媽架跤，阿媽、阿媽，阿媽架跤，阿媽架跤。

豬頭、豬肚、豬跤：（拍噗仔）原來這才是phu-loo--ê！

大野狼：戲棚跤徛久就是恁祖媽的，用心計較，四界走揣，總算予我揣著矣！原來上phu-loo的表演就佇我的身軀邊。

△大野狼總算揣著伊滿意的表演矣，伊決定欲教予閣較濟人，予這套表演繼續湠落去。

大野狼：來來來，樓頂招樓跤，阿公招阿爸，緊來緊看，慢來減看一半。逐家做伙來！（放音樂）阿媽架跤，阿媽架跤，阿媽、阿媽，阿媽架跤，阿媽架跤。

△１、２、３，多謝逐家。