國小台語課口令調整佮反思：對權威到互動的轉變／陳品怡
一、口令的起點：從秩序到反思
「khiā起來」、「khiā予好」、「行禮！」——佇教學過程中，口令一直是一種定會當看著的教學方式。真濟老師攏會佇課程開始進行抑是過程當中使用口令來管理秩序，予學生進入學習的狀態，若我，嘛是按呢，我bat佇台語課內底使用各種無kāng的口令來tshuā學生上課。
不而過，經過這幾冬教學經驗的累積kah接觸各種班級學生的多樣化，我開始對口令的使用有一寡無kāng款的看法，也開始反思每一種口令背後的意義與效果是啥物。拄開始，我對口令的理解主要是管理秩序和透過口令儀式的進行，予一寡上課較吵抑是無好進入學習狀態的班級會當知影咱準備欲上課矣。對這種較gâu吵lā的班級，我會使用較嚴肅的口令來予學生趕緊準備上課。
包括咱定聽著上課拄開始愛喊口令：「khiā起來」、「khiā予好」、「行禮！」，老師的期待是用這種方式提醒學生上課愛準備，這嘛是我家己學生生活經驗的記持。
猶毋過，教愈久我才漸漸仔發覺著這種方式對某乜學生來講無效，甚至in閣會對這種權威式的口令感受著距離、無自在，bat有學生kā我唱注講：「為啥物逐節課攏愛喊這種口令？敢有必要？」學生的話若像冷𫝏𫝏的箭射入教室內，kā規个空間kah時間攏凍甲停止流失的款。
後來下課我開始思考，口令雖然會當暫時控制局面，毋過煞無法度真真正正改善學生的學生態度，所以我決定開始進行課堂開始的口令的反思和調整。
我tua̍h-tua̍h-á意識著，其實問題無佇口令本身，是咱做老師的按怎設計佮使用口令。口令若干焦綴咧做，無感情、無互動，就變做一種壓力；若設計了好，顛倒會變做一種真有效果的課堂節奏和情感連結的方式。
二、實驗的開始：無kāng款的踏話頭
踏出調整的第一步，我先對較乖巧的班級開始做實驗。我試kā原本的口令提掉，改用閣較自然的方式來開始上課。實驗的結果是：乖巧的班級有口令無口令攏kāng款乖甲有tshun。對需要較濟引tshuā的班級，我就佇課程開始的時陣機加入閣較濟日常互動，比論講分享和這節課有關係的小故事、笑khue，予學生會當慢慢仔進入學習狀態，到後來真正修了教育學程，我才知影，原來這種方式，教育學有名叫做『引起動機』。
這幾冬我開始觀課紀錄kah觀察其他台語老師的教學方式，其中一位我真欣賞的台語老師，伊逐擺欲上台語的時陣攏會進行問答式的互動，像老師問學生：「佗一班的學生上厲害？」，學生就會kā老師回應講：「Ｏ年Ｏ班的囡仔上厲害。」這種問答默契m̄-nā加強課堂正向活力，嘛予學生閣較有參與感。所以，後來我決定kā這種類似的口令互動加入來我的課程，透過問答和口令結合的方式，提醒學生維持秩序，閣增加學生的投入度。
三、互動式口令的實施兼推展
佇實踐的過程當中，我希望我的口令會當明確閣有提醒的作用，所以拄開始我收錄的三句簡單閣有明確的口令分別是：「上課進前，坐予好」、「桌頂的物件，收起來」以及「台語課本，提出來」。
每句口令的頭前由老師來kā唸出來，句讀後就予學生做伙唸。學生那唸口令嘛愛那完成指定的動作。透過這種方式，m̄-nā會當予教室內底充滿師生的互動感kah趣味感，若是有學生猶未完成動作的，老師我閣像咧掠鬼kāng款，掠上慢的人kā登記起來，「遊戲化」的方式m̄-nā kā師生之間的距離縮短，嘛提升學生上台語課程的參與意願。
另外，我後來開始佇第一節課內底就kā這三種口令的練習練甲真熟，按呢才有法度佇後面逐節課攏自然來使用，這三種口令m̄-nā會當用佇上課拄開始，嘛會當佇課程教學當中使用。
比論講，tng-tong我希望學生專心看烏板，莫佇遐掀課本烏白看抑是分心去耍桌頂其他的文具的時，我就會隨講：「桌頂的物件～」，學生聽著就會自然接：「收起來。」這个時陣學生就會做出相應的動作，桌面的清潔度和學生的上課的注心程度絕對是有真大的關係，教室內若無物件會當予學生分心的時陣，老師的教學就會是學生上會去注心的對象。
教學到這幾冬延伸出來的互動口令愈濟，每一種攏有伊的功用，包括希望學生專心看我講話的「坐予正，得人疼」口令；希望學生綴我唸的「老師一句，我一句」口令；希望逐家予同學正向鼓勵的「予伊(恁、我)一个噗仔聲！」口令（囡仔就愛隨拍噗仔掌聲鼓勵別人抑是家己）……等等。
遮各種口令的設計kah實施，予我佇教學的過程當中會當閣較好掌握著學生的狀態。學生無閣感受著權威的壓力，顛倒會當佇互動的過程當中享受學習的過程，這種學習氣氛對台語課特別重要，因為語言的學習就是需要情感上的投入kah認同。這種設計了四序的口令，變做咱課堂內底的節奏、默契、笑聲，口令佇這時陣，伊毋是命令，是邀請。
四、管理到連結：學生的感謝是上好的回饋
到幾年以來行禮式的口令我是愈來愈少使用，有老師可能會懷疑無行禮，學生敢閣bat禮貌？敢閣願意對老師說你好、多謝？我的感受是：「強挽的果子袂甜。」，用心栽培、投入的教學，有當陣仔學生顛倒會佇上尾仔回饋予你。
雖然我漸漸kā早期「行禮」這款形式性的口令放sak，毋過我嘛思考：若這个行為是學生真心欲表達感謝的方式，彼口令嘛會變成一種情感的語言，毋是威權的命令。
就像舊年有一屆六年仔的學生予我印象足深的，彼節課是in畢業進前的上尾一擺台語課，下課的時陣，我已經攏喊：「下課矣！」，全部的學生猶原閣留tiám教室內底bua̋i走。
彼當陣的我已經感受著怪奇的氣氛準備欲離開教室的時，學生煞雄雄全班主動khiā起來，彼班台語小老師大聲喊：「khiā起來」、「khiā予好」、「行禮！」全班行禮大聲說出：「多謝老師！」。
佇彼時我深刻感受著學生對老師的感謝，這份感謝的口令，毋是我強逼in去完成的口令，顛倒是in真心對課程的回應，嘛是in對我教學的認同。這份貼心的感謝，予我體會著用心和學生建立的情感連結，學生攏看會著、感受會著。這段經驗予我看著：一个過去pat是控制節奏的工具，嘛有可能成做學生主動表達感情的媒介。
五、結語：教學儀式的反思kah前路
這篇，是我教學經驗的一段記錄，嘛是一種向學習調整教學的方式。口令問答互動較適用佇國小課程內底，若面對年歲較大的學生，就需要調整做無仝款的教學設計。
國小台語課的口令系列調整kah反思，予我更加理解、感受著成做一位老師，m̄-nā愛管理課堂秩序，閣應該愛創造一種予學生感受的尊重、關聯的學習環境。
有效果的口令，做一種教學儀式，伊會當幫贊老師建立師生之間的默契，予學生清楚感受的簡明的課程節奏，變成一種「自動好」的內化學習。
教育m̄是教冊，嘛是教人，嘛是教心。口令若會曉好好共使用，就是上好的引路語言。我願意用台語，寫這篇文章，記錄這段予人省思、予我學習的教學過程。我相信，一段好的教學關係，是對講一句好話開始的。每一句看起來簡單的口令設計，攏有可能是予台語課變甲閣較好的起點。
留言列表
