10601俗諺16攑頭三尺有神明。
漢字：攑頭三尺有神明。
羅馬字（發音）：Gia̍h thâu sann tshioh ū sîn-bîng.
釋 義：告誡人不可做壞事，否則將來必有報應。
教育部台灣閩南語常用詞點連結:(會使聽發音喔!) 點我
攑頭佇華語內底有「舉頭、抬頭」的意思。咱講攑頭三尺有神明，是咧勸人千萬毋通當作做歹代誌的時陣，偷偷仔來，無人看著就無要緊，人無看到，無代表神無看著，這个世間真濟代誌攏是咱人無法度預測的，平常時仔就應該愛保持好的習慣，做好代，才有福報。
【華語版】
攑頭在華語有舉頭、抬頭的意思。我們說攑頭三尺有神明，是在勸人千萬不要以為做壞事的時候，偷偷來，沒有人看到就沒有關係，人沒有看到，不代表神沒有看到，這個世間有很多事情是我們人沒有辦法預測的，所以說，平常就應保持良好的習慣，做好事，才有福報。
二年級的子浩台語程度誠好，這擺全程使用台語來紹介台語喔! 讚~
註：台語的變調佮斷句有真密切的關係，台語咧連讀一句的時陣，通常除了上尾仔一字讀本調，其他攏愛念作變調。這擺真歡喜看著有學生會當全程使用台語來解說俗諺，毋閣，有可能是因為這馬較無講台語的環境佮機會，所以有時陣講話會講一半就「斷去」，本來上尾仔一字才讀本調的句型，煞咧讀規句的中間就共斷句。比如講這擺影片內底，子浩講著：「這句＃話的意思是」，正常來講應該愛規句讀連讀變調「這句話的意思是＃」，伊煞真明顯佇「句＃」這个字來讀本調，所得若予母語是台語的人來聽，就會感覺怪怪的。
我發覺這馬講台語的少年人，包括我這代，有時陣講話無法度連續變調，我咧臆這款情形，無的確是因為少年人咧講台語的時陣，就參像咱咧講英語仝款，攏變成是一種需要佇頭殼內底小可仔轉換的語言，因為無法度順利思考來講出喙，那思考就那共一句話拆做規偌个詞彙，見若讀一个詞彙就斷句一擺，本來愛規句連讀變調的話，煞變做一詞一詞鬥作伙，每一个詞彙的尾字攏來讀本調，咱聽起來就會「怪腔怪調」，這是對語言生份、生疏的一種現象。
雖罔講母語應該對家庭做起，彼力量才是上大的，毋過，現此時佇學校的老師會當做的就是予囡仔加接觸這个語言，平常時仔除了「單字詞」的教學，更加愛𤆬讀台語文章，練習「完整的語句」唸讀，按呢才較有效用。
留言列表
