學期尾考試攏考了矣，因為到歇熱進前高雄市攏猶原維持線頂教學，想講來舞一寡趣味的予學生耍。
線頂課 #你畫我臆 gartic.io 的台語版本就按呢出世矣，學生耍甲無想欲下課呢！
題庫會使家己設定
我是設定五年仔課本內底的語詞和課文的重點詞
咧上課的過程當中會當看著一寡趣味的現象
比論講有學生1畫圖畫「竹田嬰」了予其他同學臆
有人會回答：「竹蜻蜓」「田嬰」「得纏ㄟ」⋯
回答「竹蜻蜓」是知影同學咧畫啥，毋過袂曉台語字對應
回答「田嬰」毋知是共意思拂毋著，抑是緊張減拍一字
回答「得纏ㄟ」就是這馬現代台語文盲定定會做的直接音譯
無仝的回答會當觀察出學生到底對這個台語詞的認知閣停留佇啥物層次
另外嘛有學生2畫圖的時陣發揮創意共「蜂仔炮」拆做「蜂仔」佮「炮」來畫
我發現有一寡學生無反應
毋知影學生2是咧拆字畫圖
所以我就閣共補充講「這是第三課的一種民俗活動，佇台南市鹽水區上有名喔！」
才拄補充了
幾个學生足激動「喔喔喔喔！！」的喊講「我知影答案矣！」
隨共答案回答出來
有夠心識
這ê活動本身互動性有強
因為有限制回答的時間
所以有影真緊張、刺激
以下是我家己觀察感覺這個活動有幾个優點就是
1.互動性強所以會當加強師生之間的感情
2.訓練使用電腦拍台語字
（這個前置教學動作是必須的，因為有學生真正毋知安怎拍台語字）
3.發揮創意擴散性思考的空間
4.展現繪畫呈現能力和表達
5. 因為學生會一直思考和回答、互動，會當真大部分避免一寡線頂幽靈學生出現
6. 上重要的是透過學生畫圖做聯想，嘛是一種課程的總複習
學生入來遊戲房間的時
會當設定家己的頭像佮名稱
所以每一ê人呈現的效果攏無仝
活動了
遊戲本身嘛會顯示名次
貼佇classroom公告
閣共學生正增強一擺
若是對教學過程中學生如何來進行活動
嘛會當來我面冊看教學過程的錄影影片
品怡的面冊紀錄
#線頂教學記錄
留言列表
