本篇短篇台語奇幻小說〈控制〉刊登於《台文戰線》75期
控制/陳品怡
（一）
天頂走閃過幾偌台空中跑車，跑車所經過的所在旋出大港風，共行佇天空步道頂的明仔推一个險險跋倒。
「是佗一个猴死囡仔的咧烏白駛！」行佇路裡，差點仔予車挵著的明仔心內是那受氣那咧tshoh，面容煞若柴頭仝款攏無表情。
明仔一个身軀烏焦瘦若竹篙，頭頂的頭鬃長甲會當共伊半爿面藏起來，伊上驚佮別人相對相，嘛無法度控制家己的表情，永遠一箍結屎面的款。
雖罔明仔無啥勇氣面對人，毋過天公伯仔是疼惜明仔的，叫伊面對「無血無目屎」的機械就親像桌頂拈柑仝款簡單，當當別人大學畢業愛面對社會出去做工課的時陣，明仔嘛發明一種面容控制器，有控制器了後的明仔看起來加真人範，彼的面容仔嘛總算毋是一个柴頭人矣。
明仔佇空中步道頂行無幾分鐘，猶閣咧受氣的伊，想著較停仔需要和新客戶交關，隨共身軀頂的面容開關共揤到「笑微微」頻道，轉換情緒的明仔喙開開，現出伊白閣整齊的前齒，笑微微大聲喊講：「歡喜的明仔和你相借問！」
行入咖啡廳，和客戶見面的明仔共「專業」頻道揤落，一睏仔的時間內明仔的頭殼理路變甲清楚、目神金金、咬字端正，展現出專業經理人的模樣說服客戶，客戶予伊案內一下無偌久就講：「這擺的案件就麻煩你囉！」順利簽約的客戶歡喜和明仔握手。
轉到公司的明仔予頂司呵咾甲會觸舌，同事用欣羨的表情看明仔的死人面講： 「欸！你hőng 褒，毋著愛較歡喜咧！」
「你講了著，我袂記得轉換頻道。」明仔話講了隨共面容控制器切對「謙虛」頻道，面容出現一種歹勢閣歡喜的表情。
「你看你按呢是欲按怎交女朋友啦！ 攏一个死人面hoonh。」
「……」明仔無共同事回應，紮一个死人面恬恬轉去位置坐。
彼若較早的明仔聽著同事講這款話，伊百面會起呸面，閣會切做「煩惱」頻道表現予同事看。
這擺無轉做「煩惱」頻道予同事看，是因為明仔真正有一位真佮意的查某囡仔—海仔。
「海仔敢會佮意我這種死人面的？」明仔頭殼𢯾咧痛，心內煩惱講。
（二）
海仔和明仔兩人是佇網路頂相拄著的，in有仝款的興趣，嘛互相有好感，真有話講。
約會彼工明仔坐空中跑車提早到現場等待，海仔煞遲到等欲半點鐘了後才到，雖然明仔等甲小可仔無耐性，毋過看著海仔來到現場了後一直會失禮的模樣，明仔猶是隨切做「無要緊」頻道講：「無要緊啦！我嘛才拄到位無偌久。」
海仔的穿插明仔猶閣會記得，海仔彼工穿的是一軀真有氣質，藍白相疊的長洋裝，烏金烏金的長頭鬃，點寡胭脂的面容，明仔干焦是看著海仔的人爾爾，就緊張甲心肝頭phi̍h-pho̍k-tsháinn。
有面容控制器的加持，明仔和海仔的感情是愈來愈好，就算是牽手佇海邊仔散步，明仔嘛會當切「浪漫」頻道，用會hőng起雞母皮的情愛話講甲予海仔會歹勢；就算是佇路邊攤仔食包仔，明仔嘛會當切「好食」頻道，共一粒包仔食甲若那食五星級米其林仝款。
就佇咧雙人感情愈來愈穩定了後，求婚彼暗的約會，雙人手牽走行佇空中步道頂，海仔走提明仔真愛食的五星級米其林包仔，那行那分享日時仔參觀機械展覽的趣味事。
「海仔，今仔日咱做伙去的機械展覽你感覺按怎？」
「真好！」海仔回答真短，毋過人看起來不里仔歡喜。
「按呢你敢願意和我鬥陣？」明仔共海仔的手牽起來，以「誠懇」的面容來面對海仔。
「咱這馬敢毋是已經做伙矣?」海仔閣共問題擲轉去予明仔。
「我講的鬥陣是未來的每一工，到老、到人生的終點的彼種鬥陣，你敢聽有我的意思？」明仔跤手真猛掠隨切「浪漫」頻道和海仔深情對話。
當當氣氛來到上曖昧的時陣，目一𥍉的速度，海仔的喙就唚向明仔的面頂去矣。
「……唔!」明仔明仔予海仔動作驚一下話攏講袂出喙。
這時陣的明仔想欲使用面容控制器轉到「歹勢」頻道，煞發現毋知影是毋是傷緊張，猶是因為海仔唚著家己的面容的關係，面容控制器煞佇這个時陣歹去。
明仔這時陣心頭亂糟糟，伊驚惶、煩惱、閣憢疑。
明仔憢疑，為啥物面容控制器會歹去？
明仔嘛驚無面容控制器的伊，就會變做一个無鹹無汫的人，會無法度來面對海仔。真濟情緒強欲爆發出來的明仔，面頂煞是任何的表情攏無，嘛講袂出任何一句話來回應海仔。
「……呼……呼……」明仔毋捌共伊彼咧柴頭面佇海仔的面頭前展現過，現場的明仔實在是緊張甲強欲昏去，一直喘氣喘袂過來。
海仔看著明仔一直揣氣閣講無話的模樣感覺真好笑講：「我總算是看著你的柴頭面矣！應該是我身軀頂的面容控制器和你的有衝突才會害你無法度控制你的表情。」
就佇海仔共這句話講了的時陣，海仔面頂的笑容嘛消失去，佮明仔仝款變做一个無表情的人。
「其實我早就發現你的表情攏是使用控制器轉換的矣。」海仔敢若是想欲予明仔莫遮爾緊張，伊那講那共伊身軀頂的面容轉換器嘛關起來。
「……」失去表情的明仔猶閣無法度隨回應過來理解海仔的話。
海仔的面因為面容轉換器關機嘛無法度展現啥物表情，毋過明仔深刻感受著海仔的目睭內彼種的情愛的眼神是愈來愈來明顯。
海仔用充滿愛的眼神對明仔講：「你莫閣使用面容控制器矣。」
「我愛的是真真正正的你，請你放心做你家己就好。」海仔接落去講。
「……」聽著這句話的明仔猶原無任何的回應，毋過伊目箍墘煞紅紅，看起來是真感動的款。
（三）
原來海仔嘛是彼種較頇顢表現家己的情緒和表情的人，伊和明仔的細漢的遭遇是欲倚仔欲倚，仝款有表情控制困擾的海仔佇大漢了後，嘛透過現代科技和家己的機械技術，設計出一套面容轉換器。
這和明仔的面容控制器理念真峇，毋過明仔切換表情是透過手揤身軀頂的開關來轉換，海仔顛倒的是透過目睭𥍉一下就會當轉換表情，按呢看起來海仔的機械技術閣彼明仔懸濟咧。
後來的明仔和海仔，這對鴛鴦愛侶互相意愛，穩定鬥陣也已經經過兩三冬矣，這幾冬內in兩人攏漸漸減少使用面容控制器，用上真的面目來面對對方，接受對方的缺點，也練習表現家己的情緒。
這工空中花園頂猶是有幾若台跑車的相輸贏，跑車後斗噴射出高壓的氣體，予現場咧花園等待海仔的明仔心情蓋袂爽。
「去輸贏去別位啦！莫蹛遮夯枷影響我和女朋友約會啦！」明仔的面看起來有小可仔受氣，大聲喊予彼寡空中跑車的駕駛聽，駕駛無咧插潲明仔，跑車佇空中輾出真大圈的圓，敢若嘛咧共明仔唱聲嘛敢若咧共剾洗。
窮實講，這幾擺出門明仔已經無閣共面容控制開關紮出門，伊佮海仔這陣仔攏真認真練習表現家己的情緒和表情。
佇公園等海仔等甲欲失去耐性的明仔，看著遠遠對遠方走過來的海仔，明仔的面拄表現出來的無歡喜表情。
「失禮啦！真歹勢予你等待，我看著你受氣表情矣，真無歡喜的款，我愛和你會失禮，是我的毋著。」海仔表面平淡冷靜，那會失禮那向明仔講歹勢。
若欲講練習展現家己表情的成果，明仔這部分是表現了比海仔閣較好，。
明仔的喙角漸開，現出伊白閣整齊幾粒仔白齒，共海仔的手牽牢牢，文文仔笑講：「無要緊！愛人是值得等待的，請你放心做你家己就好。」
2024.06.25
留言列表
