已經教兩冬的班級就是真穩定，分組討論攏真自然進行，逐家攏知影家己愛做啥，這種恬靜、注心佇課程內底的氣氛真好，我決定共紀錄起來。 😌
［引起動機］
這節課教學目標是ABB疊詞，我的引起動機是先使用一句孽譎仔話「鰗鰡抹雪文-滑溜溜」來引𤆬，後來才問學生除了「滑溜溜」，你閣知影啥物款ABB的疊詞咧？
學生通常這个時陣攏會先回答我頂禮拜教的俗語「白矸仔貯豆油-看出出」的「看出出」，紲落來才會講著一寡生活中會使用著的，比論講「芳貢貢」、「紅記記」......
［教學內容］
孽譎仔話講了，我就會請學生先將課本第二課預習了後才開始進行我今仔日教學活動，預習的時陣我會共學生提醒：「這節課我予恁預習、讀課本的時間就干焦3分鐘，請珍惜時間。」 學生攏知影我規矩，袂使看的時陣就是袂使看，所以預習的時陣攏蓋認真咧準備。
然後才予學生分組使用小白枋來練習，我共ABB疊詞拆做A一組B一組，予學生家己去配對，加強對這寡ABB疊詞的記持。
對活動過程中會當發覺著學生受華語的影響袂少，比論講影片內底我就有錄著學生共答案「澹糊糊」寫做「黏糊糊」，共「滑溜溜」鬥做「酸溜溜」的嘛有。
落尾全班作伙檢討和討論正確答案，才進入語詞的口說練習。
［學習評量］
上尾會簡單用下課進前的5分鐘，抽鬮點學生來回答，確定in的學習效果有好無。
[省思]
我發覺著先予學生家己去預習課本，才做提問的效果，會比老師直接一開始就講我欲教ABB疊詞閣較好，透過分組討論學生會當真明確知影家己的問題佇佗位，學生看課本的時陣攏感覺內容真簡單，真正共你考驗配對，顛倒華語化的語詞就一直對頭殼內走出來，心內的答案若和同學無仝，學生之間就會開始產生討論，對討論和老師後壁的檢討，學生家己印象才會深刻。
有學生下課來揣我分享講：「伊今仔日才知影伊平常時華語講『這個東西黏TT的』原來是台語喔！『 黏答答』敢若才是華語的用法hooh！」
留言列表
