Phín-î ê kì-lo̍k khong-kan品怡的紀錄空間

熒火猶咧閃爍——數念陳玉珠/陳品怡

79 期《台文戰線》才出刊無外久，封面猶是玉珠老師提供提供予阮的作品。冊猶佇桌頂，消息就傳來矣……玉珠老師離開的消息，是對面冊內朋友分享的內文才知影這個消息，我那讀彼段文字，心肝頭那酸澀酸澀，彼種心情，毋是驚，嘛毋是艱苦，是一種「攏無心理準備」的疼。

毋過，想--起來，咱上近的聯絡，猶原是真燒絡。彼陣，伊訊息回復了真緊，口氣嘛誠親切，完全看袂出來伊身體有啥物病痛。消息傳來的這個時陣，彼張封面圖佮訊息若像是一幅提早寄來的告別批。

玉珠老師 1950 年出世佇新營，是實實在在的新營囡仔。讀新營國小、國中，後來入台南師專，做老師做了三十冬，教過東山的聖賢國小、苓洲國小，閣轉去新營新民國小。伊是一位老師、是一位寫作者、嘛是一位性命的看顧者。

伊寫童話、少年小說、童詩、兒歌、散文、繪本，堆疊起來已經三十外冊。教育部文藝奬、教育廳兒童文學奬、洪建全兒童文學奬、高雄市文藝特別奬……獎項像日頭光照佇海面頂，光映映，毋過玉珠老師本人，煞是溫柔的，無愛風神的人。

伊的寫作對細漢的時陣就開始矣，頭一擺的故事是講予小弟小妹聽，後來愈講愈濟，愈寫愈順，親像生活當中自然流出來的水。〈百花門〉、〈玻璃鳥〉、〈美麗的鼻子〉……伊的筆路攏寫出一種「童心」的感覺，伊用囡仔的目睭來看人生的光暗。

九〇年代，伊主持「南瀛之美」繪本系列，對文字、圖像、地方文化，非常認真、細膩咧紀錄。彼段時間，伊替台南共一份真寶貴的兒童文學遺產保留落來。

退休了後，伊佮藝術家陳武鎮老師蹛佇後壁安溪寮，生活簡單、清幽，寫字、畫圖、泡茶、種花。彼款日子，親像伊的作品，無虛華嘛袂奢颺，毋過一頁一頁，攏有屬於伊家己的節奏、韻味。

玉珠老師的小說〈拍手〉，佇2017年得著第 4 屆「台文戰線文學獎」台語短篇小說優等賞。彼當陣，伊得獎感言，是按呢講的：「每一个人的一生攏是一篇精彩的小說，咱咧看是一个平凡的百姓，嘛有可能經歷大風大浪。」

伊寫的人物「李萬章」，是一位社會邊仔的真實人物。小說內的悲劇、曲折，攏毋是作者家己烏白編的，彼是歷史的影跡深刻佇人的身軀頂。伊咧寫這件代誌，無透過政治的大旗，嘛無直接講出人權；毋過讀者攏知影，有一段受著迫害的歷史，當咧透過一位小人物的故事，閣一擺浮現出來。伊講：「寫這段故事，用台文毋免思考。因為人物本底就生活佇彼个語言內。」玉珠老師的這句話，共咱提醒：語言的本身，就是故事。

若講著封面圖，62 期旅遊書寫專題，我捌問玉珠老師：「敢會使提供山水、漁港相關的圖？」 伊當工就回覆寄一幅〈嘉義白水湖漁港〉作品過來。畫面樸實、風景開闊，色水溫暖，筆路自由。

79 期做「反紅色滲透」，透過玉珠老師借著武鎮老師作品，彼款失國 no.1，強烈、深沉，兩位藝術家，用圖畫替《台文戰線》做出上好的「開門見山」的代表封面。

寫這篇的時，我一直想著「熒」這个字。 熒火，袂大，嘛無咧燒，毋過就親像天頂的星佇烏暗中閃爍。玉珠老師的一生，就是一種光，共囡仔學生頭前的路炤予光，仝一个時陣，伊嘛炤著咱台灣母語的根、炤著台南的土地、炤著《台文戰線》的編輯頁、炤著每一位台文的閱讀學習者。

編輯冊的人，平常攏是「翻頁」。 毋過玉珠老師的頁，我無想欲趕緊翻--過。伊的字、伊的畫、伊的語言、伊的溫柔，攏值著咱停一下，閣感受一下。

伊離開矣，毋過光猶閣佇咧。伊的熒火，影響著新營的風頭、後壁的田岸、編輯佮台文人的心內，永遠爍咧、爍咧、袂化去。

這篇文字，寫做送行，嘛寫做數念。向望玉珠老師轉去的路順序，伊的光，咱會替伊繼續保留落來，繼續傳承、生湠落去。